اني إمرأة عراقية وموظفة في الجامعة واعيش أنا وابني فقط وهو طالب في الصف السادس العلمي يعني نجح من الخامس العلمي الى السادس وما أملك بس راتبي وحاليا نسكن بمجمع الجامعة والحمد لله في شقة صغيرة جدا تحتوي بس على غرفة صغيرة وحدة هي نومنة وكعدتنة ودراسة ابني بيهة والتلفزيون يعني الوضع ضيق علينة خصوصا وابني السنة الجاية بالسادس العلمي ويحتاج لغرفة خاصة يقرة بيهة اضافة الى ان مكان السكن خارج مركز المدينة ومنهوبين من التكسيات لان صعوبة المواصلات بهذا المكان وهو راتب واحد يادوب مكفينة مصاريفنة وتنقلاتنة وطبيبنة واقساطنة .. الخ . وصحيح عندي قطعة ارض 100 متر مربع لكن ما اكدر ابنيهة نهائيا لان راتبي ميكفيني وديروح اقساط وسلف ومصاريف وطبيبي لان اني بين فترة واخرى لازم اراجع طبيب عندي امراض مزمنة ومااكدر اشغل ابني لان اريدة يتفرغ لدراستة لمستقبلة.اذن شلون اكدر ابني اني دااتعذب اخاف اموت ومامسوية شي لابني المسكين خصوصا وهو غير متطلع مثل هاي الشباب مؤدب وخجول وماعندة تدبير .اصلا حتى اليوم ابجي من الصبح لان محتارة بزماني واللة وماعندي احد يساعدني غير بس رحمة اللة وخايفة فد يوم يطلعونة من الشقة لاي سبب وين نروح .ربما هسة دتضحكون علي لان هذا مو موضوع للنقاش هذي شكوى وربما تعبتروهة استجداء وطلب مساعدة لكن نفسي عزيزة مالكيت غير هذا الطريق افرغ بيه همي.
وشكرا لقرائتكم لموضوعي اذا قريتو . واني هسة بالدوام بالجامعة .
واحب ان أنوه الى ان عمري هو 45 سنة لكن الشخص اللي ملأ بياناتي كتب مواليدي 1980 واقسم بالله وبشرفي غير صحيح لاني لا اعرف كيف املأ البيانات هو ملئها وبعدين تعلمت وما جنت اعرف انه سجل مواليدي 1980 الا لما استعرضت البيانات وضحكت هواية رغم همي لان يا ريت جان مواليد 1980 جان يرجع الزمن واعرف اختار صح واغير مجرى حياتي لكن آخ شيفيد الندم .
مع تحياتي واحترامي
العراقية
17/7/2012
[b]